Hoërskool De Aar spog met ‘n suksesvolle opedag vir Graad 7’s

Hoërskool De Aar het op 2 Mei die graad 7’s by ‘n baie suksesvolle opeaand verwelkom.

Die Arend, tesame met die SR, het die graad 7’s en hul ouers verwelkom.

Die aand het begin met 'n "Big Brag" waar almal vermaak is deur ‘n pragtige vlagseremonie en die Pom-poms se danspassies.

Die eerste spanne het ook hulle krete gedoen.

Inligting rakende die skool is met hulle gedeel en die huidige graad 8’s het ook hul eie ervaringe van die skool gedeel.

Die graad 7’s het verdaag en is deur die SR na klasse vergesel.

In die Verbruikerstudieklas het juffrou Nadia Nel saam met haar graad 12-leerders, gewys hoe hulle hul PAT’s voltooi en elke graad 7-leerling kon teen die einde van die aand aan 'n heerlike kolwyntjie smul.

In Juffrou Bekker se Lewenswetenskappeklas kon hulle na ‘n verskeidenheid organe kyk en selfs sien hoe longe opgeblaas word.

By die Fisiese Wetenskappe klas het Juffrou Koen eksperimente gedoen waar hulle kon sien hoe lugdruk werk.

Meneer Evelyn Botha het in die Rekenaartoepassings- tegnologieklas verduidelik hoe om jou eie webtuiste te maak en Meneer van Wyk het in die Landboutegnologieklas aan die kinders demonstreer hoe om metaal te sny en te buig.

Terwyl die graad 7’s deur die skool toer het die ouers en die onderwysers, saam, ‘n heerlike koppie sop geniet en gesels.

Ons by Hoërskool De Aar is baie opgewonde om al die graad 7’s ware Arende van HSDA te maak!